A o lumana’i le faigāpalota tele i le faai’uga o lenei vaiaso i Samoa, o le faai’uga o le a taunuu iai ma se faigāmalo fou o le a tula’i mai mo le isi lima tausaga, ua ave ai le faamanatu tāua a le Komisi e pulea tagata faigaluega uma a le malo i le ‘autautua a le komisi o auaunaga i matāgaluega a le malo, aemaise foi o se fautuaga e aogā ma tāua i le ‘augalulue i faalapotopotoga tuma’oti uma a le malo.
I se faasalalauga i lana upega tafa’ilagi ua faailoa ai e le komisi, “I le mae’a ai o soo se faigā filifiliga, ma ua mautū le faigāmalo o le a tu mai i le foe mo le isi 5 tausaga, e tatau lava ona iai ni suiga.
O suiga i galuega ma matāfaioi faatino, o suiga i auala o le a faatino ai galuega, faatasi ai ma fuafuaga alualu mamao, e fua iai le galulue a le Aufaigaluega a le Malo.
Ae o a tatou aga tausili, e pei o le galulue lē faaitu’au, faamaoni, faaaloalo, ma le alofa ia Samoa, e lē tatau ona suia, ma e tumau pea mo le isi 5 tausaga o loma nei.
O lo tatou tiute lena faale’aufaigaluega a le Malo, o le Tautua ma le auauna mo Samoa, e ala i o tatou tofiga ma valaauina”.
E pei ona silafia o le tuana’i o le palota tele na faia i le tausaga e 2021, ma tula’i mai ai se faigāmalo fou mo le taimi muamua i le tuana’i o le 40 tausaga o pulegamalo a le pati faaupufai e puipuia aiā tatau a tagata, sa feagai lena faigāmalo fou ma ni lu’itau i le va faafeagai ai ma le ‘aufaigaluega a le malo.
Sa oo ai lava ina laumanu’ia i le tausaga muamua o lena pulegamalo fou se solo tetee a le ‘aufaigaluega a le malo, peita’i e le’i taunuu.
