Ua momoli le faamalo a le tama’ita’i Palemia o le Malo tausi le afioga Fiame Naomi Mataafa i le susuga Laaulialemalietoa Leuatea Polataivao Fosi Schmidt le ta’ita’i o le vaega faaupufai o le Faatuatua i le Atua Samoa ua tasi ua manumālō i le faigāpalota a le atunuu, ae o le Palemia filifilia o le faigāmalo fou, i lona avea ai ma ta’ita’i o le faigāmalo ua filifilia e Samoa.
Ua ave ai foi ma faamanuiaga a le tama’ita’i Palemia o le malo tausi i le susuga i le Laaulialemalietoa ina ia sao ma uli lona tula’i mai i le ta’ita’iga o le malo ma lana vaega faaupufai.
O le faato’ā saunoa faalaua’itele lea o le afioga Fiame Naomi Mataafa i le tuana’i ai o le faigāpalota i le aso 29 o Aokuso ma faailoa le faai’uga aloa’ia o le faigā filifiliga aoao a le atunuu i le Aso Faraile na te’a nei.
O le saunoaga faalaua’itele a le Palemia o le malo tausi na faafetai ai foi i ta’ita’i o ekalesia eseese, o ta’ita’i o patī faaupufai ma sui tauva uma sa tausinio aemaise o sui ua filifilia mai e o latou itumalo, ae na taualuga lana faafetai i lona itumalo.
Le afioga Fiame Naomi Mataafa, o le Palemia o le malo tausi ma le ta’ita’i o le patī faaupufai o le Samoa ua Potopoto.
