Ua teena e le kamupani vaalele o le Samoa Airways se tuua’iga sese ua faaleaga ai lana tautua mo faigamalaga i le va o Samoa e lua, ma ua tuuina atu ai i leoleo e faia iai se su’esu’ega.

Ua faailoa e le kamupani vaalele o se tagata e suafa ia Mau Hunt na ia faasalalau lea tuua’iga na ia ta’ua ai o se pusamaliu na aumai mai Amerika Samoa i se malaga a le Samoa Airways ma sa fafao mai ai fualaau faasāina.

Faaalia e le kamupani vaalele e sese lea faamatalaga.

Na maua se fesoota’iga i le susuga Mau Hunt ma tāpā ai sona finagalo e tusa o le tala na ia faasalalau, poo fea na ia maua mai ai.

O se talanoaga ma le susuga Mau Hunt.

I le pepa o faamatalaga mai le Samoa Airways ua faailoa ai ua ta’oto le ta’iala e faatino ai le tauaveina o se pusamaliu i faigamalaga a ona vaalele ona e faatāua le faaaloalo.

O maliu foi e tauave e ona vaalele e iai ma tagata o se aiga i le faamalieina o aiaiga uma faaletulafono.

Ua ta’utino le kamupani vaalele e le’i tauaveina e le Samoa Airways se pusamaliu i se auala e pei ona faailoa e Mau Hunt i sana faasalalauga.