E 20 tausaga o se alii o loo a’oga i matāupu faaletulafono, na ia faaulu i le faamasinoga se tagi faasaga i le Auckland Transport ina ua ia mautinoa o le a tula’i lava o ia e fai ana folasaga e lagolago ai lana tagi, nai lo le faaalu o se tupe e totogi ai se loia e finauina lana matāupu.
O le alii o Sean O’Loughlin na ia faaoo lana matāupu i le Faamasinoga Maualuga i Aukilani, e finau ai sa le’i mulimulita’ia e le Auckland Transport le tulafono, ina ua latou faatulaga ni vaega faa’oso se tolu poo speed bumps ma sii teisi i luga se kolosi mo tagata savavali i le The Parade i Bucklands Beach.
Na aumai le faai’uga a Justice David Johnstone e solitulafono le faiga o na vaega i le auala.
Ta’ua e O’Loughlin, e lē faapea e musu i suiga ua faia i le auala, ae o lana tetee o le lē mulimulita’ia e le AT o le faagasologa o faiga faai’uga o nei galuega ma ina ua faatulaga le kolosi e latou te le’i mua’i mafaufau i āuga pe lē ono faalavelavea ai le feoa’iga a taavale faapea foi i tagata.
O lea la ua toe tuuina atu le faai’uga i le AT e toe iloilo ana faai’uga ina ia ogatusa ma le faai’uga ua faia nei e le faamasinoga.
Puna o Faamatalaga: https://www.rnz.co.nz/news/national/571083/the-law-student-who-took-on-auckland-transport-over-speed-bumps-and-won?cid=newsletter
