I se pepa o faamatalaga i luga o upega tafa’ilagi, na faamaonia mai ai e le Komisi o Pisinisi a Niu Sila, Commerce Commission lo latou ave ai i le tulafono o se kamupani e ta’ua o le Nane Easy Loans Finance Services NZ, talu ai e maua ane e le’i lesitalaina faaletulafono lea pisinisi e tusa ai ma aiaiga o le avea ai ma se kamupani e faatinoina nonogātupe, ae o loo maitauina le faatino ai o nonōgatupe a le tele o tagatānuu i le faaitu i Saute o Aukilani.
Ua faamauina o le to’atele o i latou o lea na faaaogāina lea auaunaga o tagatānuu Tonga.
I nisi o lipoti mai le tasi o ofisa faasalalau The Post, na ta’ua ai o lē ua faasala nei o le tamaitai e suafa ia Ilaisaane Malupo, ma na amata faatino mai le faia o nei nonōgatupe i le masina o Mati i le tausaga 2024.
Ma e molimauina le oo atu i le 15% o lafoga totogi i le vaiaso e tuu i luga o le nonōgatupe a le tagata ma le tuutuuga e ono faaopoopo pe afai ae lē mafai e le tagata ona toe totogi atu le seleni i totonu o le 28 aso, ma le $10 e totogi i le aso i aso ta’itasi uma e faatuai ai ona totogi atu lea seleni.
Na ta’ua e le sui o le Komisi, o le to’atele o tagata o loo aafia o nisi o loo maitauina le feagai ma faafitauli o le lē a’ua’u o le faasoa ma oo ai lava ina aga’i i le Nane Finance e nonō mai ai se tupe e tau ina maua ai ni meaai taumafa, na nisi o vaega o loo moomia e o latou aiga.
I lipoti, o le tamaitai o Ilaisaane Malupo e na te faaaogāina upega tafa’ilagi le social media e faalauiloa ai lana pisinisi, ma ua iai molimau o le faia e lea tamaitai o uiga taufaamata’u i nai tagata e ala i le faalauiloa mai i luga o upega tafa’ilagi o suafa o nai aiga ma tagata ua lē mafai ona toe totogi atu seleni.
Ma i le alia’e mai o lenei matāupu, ua fautuaina e le Komisi o Pisinisi i Niu Sila le mamalu lautele o le atunuu o loo alala ma pāpā’aao i le itu Saute o Aukilani, ina ia faafesoota’i atu lo latou ofisa pe afai sa ia faia se nonōgatupe pe o silafia se isi na fai sana nonōgatupe mai lea auaunaga.
Puna o Faamatalaga: https://www.facebook.com/photo/?fbid=1170706538434927&set=a.305484588290464 https://www.thepost.co.nz/business/360721701/tongan-community-lender-slapped-criminal-charges
