E to’a 10 tagata ua faamaonia mai ua maliliu i se a’oga i le aai o Graz i Austria, lipotia mai e le CNN o ē ua maliliu e aofia ai nai tupulaga talavou ma o se tasi lenei o faalavelave matuiā ua aofia i le tala’aga o le atunuu.
O leoleo a le atunuu ma sui o falema’i na ave atu iai le aumanunu’a na o latou faamaonia ane ua aafia ma ua faailoa ai o tamaiti ua aafia e i le va o le 14-18 tausaga le matutua.
I se feiloa’iga a le minisita o matāupu faalotoifale ma le autusitala na faailoa ai foi e to’a 12 isi tamaiti o loo manunu’a ma e tugā manu’aga o nisi.
O lē na faatupuina le faalavelave ua lipotia e 21 tausaga mai Austria lava, ma sa a’oga muamua ai i le a’oga lea ae le’i faauu.
Fai mai sa ia faaaogā auupega o fana e lua e faatino ai lana osofa’iga ma mulia’i toe fana ia lava i se nofoaga i le a’oga.
E lē o mailoa i le taimi nei le mafua’aga ua faatino ai lenei solitulafono ma e foliga na o ia na taupuleina lea osofa’iga.
Ua taofia e leoleo ‘au’upega na faaaogāina ma o loo faagasolo i le aso le su’esu’ega ae ua folafola e le ta’ita’i o Austria Chancellor Christian Stocker aso e tolu o faanoanoaga a le atunuu ona o lenei faalavelave ma ua leai ni upu e faamatala ai lagona o le faanoanoa ma le mafatia.
Puna o Faamatalaga: https://edition.cnn.com/2025/06/10/europe/austria-graz-suspected-shooting-incident-intl
