E ta le 4 o le afiafi o le Aso Lulu o lenei vaiaso i Samoa ua ausia le 83 tesimale 3 pasene o tagata e agavaa ona palota ua mae’a ona lesitala, ma oo ai le aofa’iga o i latou ua usita’ia le faia o lesitala i le 97 afe ono selau valusefulu fā.
Ua totoe ai nei se aofa’iga e 19,541 o tagata e le’i lesitala a o faitau itula ai nei ona mae’a ma tapunia le lesitala pe a ta le 4 o le afiafi o le Aso Tofi lenei i Samoa.
I faamaumauga lata mai e pei ona tuuina mai i le afiafi o le Aso Lulu e le Sui Komesina o faigāpalota ua molimauina ai e tolu itumalo o loo silia pea i le lua afe tagata agavaa ona palota e le’i lesitala.
O itumalo faapalota o Vaimauga 3 e 2,152, Faleata 1 e 2,861 ma Faleata 3 e 2,271.
E lima itumalo o loo faamauina o loo silia i le tasi le afe tagata palota e le’i lesitala e pei o Vaimauga 1 e 1,303, o Vaimauga 2 e 1,210, o Vaimauga 4 e 1,109, o Faleata 2 e 1,931 ma Sagaga 1 e 1,820.
O le itumalo o Lotofaga e toe to’afitu tagata agavaa e palota e le’i lesitala, pito atu iai Faasaleleaga 5 e toe 11 tagata e le’i faia ni lesitala, ma Alataua i Sisifo e toe 15 e le’i faia ni lesitala.
O le lola palota uma a itumalo faapalota e 51 o le a tapunia lē tumau i le afiafi o le Aso Faraile nei le aso 4 o Iulai i le ta o le 4 i le afiafi.
O le Aso Lulu o ananafi lea i Samoa na tapunia ai le nofoaga i le maota o Tuiatua Tupua Tamasese Efi sa faagaioia ai lesitala ae o le faletaalo le Gym 1 i Tuanaimato le tasi o nofoaga o lesitala, e faato’ā tapunia i le afiafi o le Aso Tofi lenei i Samoa.
O nisi o galuega o le lesitala o le a faamae’a i le ofisa autū o le Komisi o faigāpalota i Mulinuu i le Aso Faraile le faai’uga o lenei vaiaso i lo tatou atunuu.
