Ua ausia e Samoa se isi matāti’a tāua i polokalame o loo taumafai ai e faaitiitia suiga o le tau, aemaise i le faaitiitia o kasa kaponi i le faaaogā o taavale e ola i le eletise, ae lē o taavale o loo ola i suauu ma penisini.
O taumafaiga nei o loo una’ia e le UNDP poo le faalapotopotoga o atina’e a Malo Aufaatasi, ae faatupe e le malo o Iapani e pei ona aumai ai taavale e 76 e ola i le eletise o loo faaaogā e nisi o matāgaluega ma faalapotopotoga a le malo.
O lea ua tatala aloa’ia i Tuanaimato i le nofoaga o iai nisi o auaunaga a Malo Aufaatasi ma lo tatou malo se nofoaga e fafaga ai maa o taavale ola i le eletise o loo faaaogā e le malo.
O se isi lea o vaega tāua i le polokalame a le malo o Iapani ma le UNDP o loo fesoasoani ai ia Samoa ma isi atunuu o le Pasefika, e pei ona faamautū i le fono a ta’ita’i o le Pasefika ma ta’ita’i o le malo Iapani i le fonotaga o le PALM sa usuia i Tokyo i Iapani i le tausaga na te’a nei.
O le Minisita o Tupe o le malo tausi le afioga Lautimuia Afoa Uelese Vaai sa fai ma sui o le malo e tatala lea nofoaga.
