O le avea ai o le Komesina o le pulega o le tineimu ma faalavelave faafuase’i a Samoa e fai ma sui o le Pasefika i se fono tele faavaomalo i Ausetalia, ua ausia ai e le tatou atunuu se matāti’a i le tulaga o le faalauiloa o faigāpaaga ua fausia e lea pulega ma se tasi o faalapotopotoga faavaomalo o loo feagai ma le faamaopoopoina o auaunaga ma tautua i lea galuega.
O le Komesina o le tineumu ma faalavelave faafuase’i le afioga Tanuvasa Oloapu Petone Mauga e pei ona faailoa i se pepa o faamatalaga sa ia faia se folasaga i lea faatasiga tele sa folasia ai le faigāpaaga a Samoa i le vaega o le tineimu ma galuega lavea’i i taimi o faalavelave faafuase’i ma le auaunaga faapea i le setete o Vitoria.
O se tasi o vaega tāua sa faailoa ai e le Komesina o le tāua o lea faigāpaaga sa faamautū ai le galulue faatasi i le taimi o le taligamalo a Samoa i le fono a ta’ita’i o Malo o le Taupulega sa usuia i lo tatou atunuu ia Oketopa o le tausaga ua mavae.
