O se maliega i le va o Ausetalia ma Vanuatu o le a lē faataunuuina lona sainia i le asō e pei ona lipotia e le leitio faavaomalo a Niu Sila ona ua faimalaga atu Anthony Albanese i le atumotu mo sana malaga.
O lona uiga la o lea o loo lē mautonu le tulaga o le maliega ae o le masina na te’a nei na faimalaga ai le minisita o le puipuiga, minisita o le va i fafo ma le minisita o matāupu tau Pasefika a Ausetalia, faigāmalaga i Vanuatu e faamanatu ai le faai’uina o feutana’iga na faia faatatau i lea maliega.
Pe ā ma le 500 miliona o le a faamatuu ai e Ausetalia ia Vanuatu mo le 10 tausaga e faatupe ai nisi o taumafaiga aemaise i matāupu tau le tau, puipuiga ma le tamaoaiga.
Ta’ua i le lipoti e lē o mailoa tonu poo le ā ua taofia ai le sainiga o le maliega peita’i o loo faatalitali nei poo le ā le tonu o le a iai auā e mae’a ona malaga Albanese i Vanuatu ona aga’i sa’o lea i le fonotaga a le Forum i le Atu Solomona.
Puna o Faamatalaga: https://www.rnz.co.nz/international/pacific-news/572526/australia-vanuatu-agreement-hangs-in-the-balance-as-albanese-flies-to-port-vila-ahead-of-pacific-islands-forum
