O Ausetalia le isi atunuu lea o le a o latou amana’ia le setete o Palesitina pe a oo atu i le fonotaga tele a Malo Aufaatasi e faia i le masina fou o Setema.
Ua faailoa e le BBC ua faaopoopo atu ai Ausetalia i isi atunuu e pei o le UK, Farani ma Kanata pei ona saunoa iai le Palemia, Anthony Albanese.
Fai mai a ia o Ausetalia ua o latou faamauina faanaunauga o le Pulega a Palesitina poo le Palestinian Authority e aofia ai le fetuuna’i o le militeli, faia faigāpalota lautele a le atunuu ma ia faaauau pea ona amana’ia le aiā tatau a Isaraelu ma e manatu Ausetalia o le two state solution le tali sili ia faamuta ai loa vevesi i Sasae Tutotonu aemaise o le fia taumamafa o tagata i Gaza.
O loo ta’ua i le lipoti lea a le BBC se finagalo o Isaraelu e faatatau i le amana’iaina o le setete Palesitina e faapea o se faiga o le a maua ai se taui lelei mo faiga faatupu faalavelave.
Faailoa e Albanese ua faia le faai’uga lea a Ausetalia e lagolago ma amana’ia le setete o Palesitina ina ua mae’a faailoa ane e le Peresetene o Mahmoud Abbas o le a leai se vaega a le Hamas e faia i faai’uga fai a Palesitina i le aga’i atu i le lumana’i.
Ua iai lipoti i le asō ua ta’ua ai le lē fiafia o Isaraelu i le faai’uga ua faia a Ausetalia.
Puna o Faamatalaga: https://www.bbc.com/news/articles/cvg33351n61o
