O se maliega fou ua avanoa ai le auala mo se ono toe faanonofo ai o le faitau selau o ni tagata e lē sitiseni mai Ausetalia i Nauru ua faitioina e le ‘ausulufa’i ma tagata e lagolago iai.
Ua tula’i mai lea tulaga a o taumafai Ausetalia e faapasi isi tulafono fou e faafaigofie ai ona tipoti tagata.
Fai mai lipoti e $400 miliona Ausetalia e maua e Nauru i lalo o lea maliega.
O se kulupu o tagata pe ā ma le 300 e lē sitiseni ma e faaigoa NZYQ Cohort e ono muamua aga’i ese i lalo o sea maliega.
Saunoa le sui ofisa sili o le Australian Asylum Seekers Resource Centre o Jana Favero i le Pacific Waves, ua lē sa’o ma lē faamanino lelei ane e le malo lana maliega lea ma Nauru.
O le Memo of Understanding poo le maliega sa folafola i le aso 29 o Aokuso e le’i faamatuuina mai lava.
Fai mai Jana o le popolega i le mea o loo tula’i mai ona e ono mafai ona tipoti se vaega tele o tagata mai Ausetalia i Nauru, aemaise le tele o tupe faaalu ma isi faanunumi o loo aofia ai.
O le pili la ua fuafua e pasia i le vaiaso nei ma faagaioi ai loa ia fuafuaga.
Puna o Faamatalaga: https://www.rnz.co.nz/international/pacific-news/572016/refugee-advocates-decry-australia-s-plan-to-mass-deport-non-citizens-to-nauru
