O le asō i Sini o loo faamanatuina ai le 63 tausaga o le tuto’atasi o Samoa i polokalame ua tuufaatasia e le komiuniti Samoa e taulamua ai le Fono a Samoa Niu Sa Uelese e pei ona masani ona o latou tuufaatasia lenei faamoemoe i tausaga ta’itasi.

O le Whitlam Centre i Liverpool o loo faataunuu ai lea faamoemoe i le asō, o loo tumutumu ai le komiuniti Samoa e lagolago ma auai i polokalame ua tuufaatasia e aofia ai faafiafiaga faa-Samoa aemaise foi o le maua ai o le avanoa e taumafa ai nai taumafa Samoa e seāseā foi ona toe maua i vaiaso ta’itasi.

Faailoa e le failautusi o le Fono a Samoa NSW i talafou, Tafilipepe Ana Ioane, o se avanoa e lē gata ina faamanatu ai le tuto’atasi o si o tatou atunuu, e faatāua ai le aganuu, o le gagana aemaise foi o le toe tofo ai o taumafa masani a Samoa, ma faalauiloa ai meataulima ma taleni foi a nai o tatou tagata o loo faaauau ai pea le sa’iligamalo i nei atunuu.

O le faai’uga foi o le vaiaso na molimauina ai le taumafaiga a le komiuniti Samoa i Newcastle i le faamanatuina lava o le tutoatasi o Samoa.

E lasi polokalame sa faatinoina, e pei o le ‘ava o feiloa’iga, siva faaleaganuu ma faafiafiaga o pese ma taleni faaalia, e faatāua ai lava le aganuu ma le gagana foi aemaise o avanoa e feiloa’i ai ma mafuta le komiuniti o tagata Samoa i lea faaitu o le setete o Niu Sa Uelese.

Na maua foi e talafou e iai nai isi polokalame faamanatu sa faatino i isi foi setete o Ausetalia o loo alala ma pāpāaao ai tagata Samoa, e faataua ai pea se tasi lea o aso taua i le talafaasolopito o le atunuu.