Ua iai se lipoti fou ua ta’ua i le lipoti a le leitio faavaomalo a Niu Sila e faapea o le to’atele o tamaitai e faafaigaluega atu i Ausetalia i lalo o le polokalame o le PALM poo le Pacific Australia Labour Mobility e lē o lava le faamatalaga talafeagai e mana’omia e i latou ma mafai ona o latou mauaina e faatatau i auaunaga tau le soifua mālōlōina i mataupu tau feusuaiga.
Fai mai le lipoti o su’esu’ega sa faatino i le matāupu lea ua iloa ai sa iai faaletonu i le avanoa o ia tamaitai i tulaga tau le malupuipuia i tulaga tau feusuaiga aemaise le tausiga i le taimi o ni ma’itaga faapea foi togafitiga ma tulaga faapea, ma ua valaau ai nei le Australian Women’s Health Alliance mo se silasila toto’a i lea tulaga ma ia faia iai se faatatau mo tamaitai o loo galulue pea i lalo o le PALM scheme.
Fai mai le lipoti ua maua e se tagata su’esu’e a Ausetalia nisi o matāupu e faatatau i tagata faigaluega e iai visa faigaluega lē tumau, sa natia ma’itaga a o iai i galuega ma taumafai e faapa’ū ma’itaga ma ta’ua foi le faaalu o le mau tupe i le faatinoina o ia taumafaiga.
Ua ta’ua e Dr Beck o se tamaitai e iai lona falema’i i Wagga Wagga i Ausetalia, e iai gasegase e aga’i atu i lona falema’i o tamaitai e galulue i lalo o polokalame ia o galuega faavaitaimi aemaise le fasimanu, ma latou te mana’omia le faapa’ū o ma’itaga ona o le manana’o ia tumau pea ona aumau ma faigaluega i Ausetalia.
Na ia ta’ua foi o le mataupu lea e foliga ua tuuina ai le tamaitai i se tulaga e ao ai ona filifili poo le faasaoina o lona ma’itaga pe tausi aiga o loo faamuli mai i o latou atunuu.
Puna o Faamatalaga: https://www.rnz.co.nz/international/pacific-news/562907/home-abortions-and-hiding-pregnancy-research-reveals-hard-realities-for-migrant-workers
