Auai le tamaitai o Moelotoleulaolemamae Vitolia Tuilaepa Tiatia i le Festival i Hawaii. 

Ua 22 tausaga o le tamaitai o Moelotoleulalemamae Vitolia Tuilaepa Tiatia e mai le afioaga o Avao, Fagamalo, Falelatai ma Faleula. 

Sa a’otauina i le aoga o Leulumoega Fou i le aoga tusiata i le tolu tausaga. 

Na iai nisi o fanau sa latou aooga faatasi i lea mataupu peitai e uma ane lana tolu tausaga ua totoe ai na o ia o loo faaauauina lea mataupu. 

O le susuga i le alii pule ia Pelenato Liufau ma lona faletua ia Susana Liufau sa tele lo la sao i lenei tamaitai a o faaiuina ai lona tausaga mulimuli. 

Sa auai i le sailiga o se tausala a Samoa i le tausaga 2023 ona o lona naunautaiga e fia faalauiloa atili le latou aoga, e lē o le fia malo, ae ia taumafai ia faailoa ma ta’u atu i tupulaga le aogā o le aganuu a Samoa, ae lē gata i lea o le lololo o le tatou gagana. 

Sa faailoa atu foi lana faafetai i tagata uma aemaise o mātua o ona mātua sa agalelei ma fesoasoani i lona olaga tuputupu a’e. 

O le auai atu o Moelotoleulalemamae i Hawaii o se avanoa lē aumaua e tagata e pei o ia, aemaise o tupulaga talavou e faatāua le avanoa ua maua e fai ma sui o Samoa i lea polokalame tele. 

O ia o se sui o le Onomea Production, faapea tamaitai anofale. 

O le faamoemoe i Hawaii sa mafai ai ona faaali laei Samoa, auā sa tuufaatasia uma i latou o loo iai faaaliga o le mamanuina o laei eseese i totonu o Samoa ma le maopooo o le latou malaga. 

Sa maua le avanoa e talatalanoa ai ma isi tagata mai isi atunuu, ae faapea foi le matamata i le tele o meataulima eseese. 

O le taimi muamua lea ua auai atu ai lea alo o le atunuu i le Festival i Hawaii. 

E tāua le gagana Samoa faapea tu ma aga faa-Samoa, ae lē na o Samoa, ae faapea foi i isi atunuu o loo taumafai latou e faaolaola a latou tu ma aga ma le fausiaina o latou meataulima. 

Ma o le tāua la o le gagana ma tu ma aga faa-Samoa i lona olaga ona ua maitauina ua tele tupulaga ua lilifa i tu ma aga mai fafo, ae e naunau lava i lana augatupulaga ia taumafai ia taofiofi mau lava i le tatou gagana ma le aganuu. 

Toaga i le lotu, fai mea i totonu o le nuu usitai i mātua auā o latou o faiaoga muamua i fanau. 

O le Miss Samoa ma le Miss Pacific Islands ia Moemoana Safa’atoa Schwenke o lona uso laititi ia Moeatalani faatasi ai ma lona tuaa ia Maryjane na laeiina nisi o laei a le Revitolize Designs, ae faapea foi i le tamaitai ia Tia Taefu, ma nisi o i latou o loo aumau i Hawaii sa latou fiafia ma laeiina o latou ofu i totonu o le Festival. 

Ma sa faaalia le agaga fiafia o le tamaitai ia Moelotoleulalemamae Vitolia Tuilaepa Tiatia ma ua tutulu foi ina ua ia vaaia le taimi a o laeiina ai e le toatele o tagata ana ofu i lenei polokalame. 

I lona lagona o se avanoa lē aumaua mo ia ma le tulaga mati’e ua oo iai lona taumafai i lenei moemitiga ua ia ausia.