O loo i le atunuu o Papua Niu Kini le faailipu a leoleo o Samoa i se valaaulia e auai i se faaaliga o tomai tau musika a leoleo o le Pasefika, ma o se faaaliga o le a avea o se tasi o polokalame o le faamanatuina o le iupeli auro poo le 50 tausaga o le tuto’atasi o Papua Niu Kini.
Faailoa e le Matāgaluega o Leoleo, Falepuipui ma le Toe Fuataina i ana auala o fesoota’iga, o le Aso Sa na taunuu ai le fā’ili ma faia ai le faaafe a nisi o tagatānuu o Samoa o loo aumau i lea atunuu ona o galuega.
O loo iai faatasi foi ma le Komesina o leoleo i lea atunuu ona o le fonotaga a faauluuluga o auaunaga faaleoleo a atunuu o le Pasefika o loo talimalo ai le matāgaluega o leoleo a le atunuu o Papua Niu Kini.
