Ua faaalia e sui o vaega‘au poo fitafita tau a Niu Sila le NZ Army lo latou fiafia tele i le maua ai o lo latou avanoa i se tasi o tauvaga na faatautaia ma tuufaatasia e le vaega‘au a Fiti.

O lenei tauvaga ua ta’ua o le Fiji Military Forces Skill at Arms Competition. 

Na maua ai le avanoa a Niu Sila, la latou vaega‘au ua ta’ua o le Victor Company, 1st Battalion, Royal New Zealand Infantry Regiment. 

E tusa ai ma faamatalaga i luga o upega tafa’ilagi a le NZ Army na faamanino ai o lenei faatasiga o se polokalame a fitafita Fiti, e saga faamausalī ai faatinoga o galuega a fitafita aemaise o le galulue feoeoea’i ai o fitafita mai atunuu e lua. 

I faamatalaga na māua ai le faafetaia e sui o vaega’au a Niu Sila ia Fiti mo le fatautaia ai o se faatasiga matagofie. 

Photos: New Zealand Army

Ua faamauina o lenei faatasiga tele, o se polokalame na faatautaia e sa’afi ma manatua ai se tasi o fitafita a le malo o Fiti, e suafa ia Corporal Sukanaivalu VC, o se alo o lea atunuu na matua’i laualuga ana taumafaiga e pei ona faamauina i talafaasolopito lona taumafai e faasaoina mai nisi o ona auuso na lavevea i le taua i le tausaga 1944 e pei ona ia auauna ma tautua ai i le atunuu o Solomona. 

I le taunuuga o lenei tauvaga na sola mai ai le vaega‘au poo fitafita Niu Sila ma le manumālō, e pei ona maua ai e le Victor Company le faailoga o le Top Shot, Top Individual i le itupa o alii ma le Top Team. 

Na auai atu foi vaega‘au a Ausetalia le 8th/9th Battalion, Royal Australian Regiment i lea faatasiga tāua.

Puna o Faamatalaga: New Zealand Army