Ua faamanatu ma faamalosi matua o se tamaititi ua aafia I le fiva rumatika I tagata matutua aemaise lava matua I komiuniti ale Pasefika ina ia silasila totoa i tulaga e pei o le maneso I tino o tamaiti ae faapea foi le tiga o le faai tulou.

Lipoti a le RNZ ua taua ai sea faamanatu ma pe a ma le 33 pasene o I latou na aafia I le fiva rumatika ile 2021, o tagata mai le Pasefika ma e le o iai se vailaau mo puipuiga I lea tulaga ma afai ae le faia iai se togafiti e ono oo ina aafia ai I le gasegase o le fatu pe iu foi ina maumau ai le soifua.

Taua ile lipoti ole tamaititi 13 tausaga mai Aukilani o Israel Neemia sa iai ana moemitiga e avea ma tama lakapi iloga, o le fitu o ona tausaga na faamaonia ai le aafia ile fiva rumatika.Sa maitauina e ono matua ni suiga ia Israel ma ave ai I le White Cross mo se siaki ma mulimuli ane ai I le falemai I Waitakere.

Fai mai le lipoti na iloa mulimuli ane o loo iai se liki I lona fatu ma amata faia loa iai togafitiga e aofia ai ma le faiao se tui I masina taitasi mo le 10 pe sili atu foi tausaga pei ona saunoa iai le fomai Dr Dianne Sika Paotonu mai le vaega o loo feagai ma le suesuega ole faamai, fiva rumatika.

O le vave ona iloa ma lipotia o tulaga ia o loo fautuaina foi e le minisita mo Tagata Pasefika, Aupito William Sio ina ia alofia ai ni aafiaga ogaoga I le soifua o tagata. O loo galulue nei le Iunivesite o Aukilani mo se vailaau mo puipuiga ma fesoasoani I le taofia o le fiva rumatika ma ua inivesi foi e le malo le 10 miliona mo lea fuafuaga.

Mo le alii o Israel Neemia o loo tumau pea lana moemitiga ia taalo I le NRL pei ona faaosofia ai o ia e le alii taalo o Roger Tuivasa Scheck lea ua taalo nei ile Blues.