Ua faalia le lē fiafia o se alii faipisinisi i Mt Roskill i le Matāgaluega o Leoleo, ona o le lē manatu mamafa i matāupu e alia’e mai.

O le alii o Faizan Bakrawala, e ana ina le faleola o le Unique Mobile Shop ma na aafia lona faleoloa ina ua faaleagaina e ni ‘augaoi e to’afā ma ave faamalosi le oo atu i le $20,000 o meatotino i le faleoloa.

 E aofia ai masini komepiuta poo laptops, MacBooks ma telefoni taugatā.

O le atugaluga o lenei alii e mafua mai i le umi o se taimi o faatalitali le oo atu o se leoleo e tali i lana valaau atu e tusa ai ma le matāupu. 

Faamatala e Faizan, o le matāupu na tula’i mai i le tulua o po ma ao o le Aso Gafua ma le Aso Lua ma na ia valaauina le ofisa o leoleo i le ‘afa tonu o le itula e 7 i le malama a’e o le taeao o le Aso Lua, ma le manatu o le a vave ona tali atu malu o le malo, na tali ane le ofisa o le a aga’i atu leoleo, e ‘afa le aso e leai lava, na toe faafesoota’i e Faizan le ofisa i le itula e 3 ma le tala na fai ane, e tapena loa le faleoloa, i mea na faaleagaina, ma le manatu o le a aga’i atu nisi, ae peita’i e uma lelei le Aso Lua, e le’i oo atu se isi. 

Ae molimau Faizan, e uma aso e tolu faato’ā ia iloa na asia e malu o le malo lona faleoloa i le Aso Lua lava lea, ae ua loka le faleoloa ua leai se isi o iai i le nofoaga.

Ua fesiligia ai foi e le alii faipisinisi le tonu ma le sa’o o gaioiga ma le faatino ai e leoleo o le latou pitolaau. 

Ta’ua e lea alii ona faanoanoaga i le lē amana’ia e leoleo o sana talosaga atu a o iai i taimi o faigatā.

Ma na ia ta’ua foi e lē o le taimi muamua lea ua aafia ai lona faleoloa.

E lē o mailoa foi le lumana’i o lana pisinisi talu ai le telē o le seleni ua gaoia, aemaise seleni ua faaalu e toe totogi ai paaga e ana le tele o meatotino na avatu i lana pisinisi e faaleleia.

Puna o Faamatalaga: https://www.stuff.co.nz/nz-news/360707522/disappointed-business-owner-furious-after-police-visit-closed-store-hours-after-burglary