Ua faailoa e le Palemia o le Atu Solomona o Jeremiah Manele e 21 atunuu na foa’i atu, donor countries e aofia ai Amerika ma Saina o le a lē valaauliaina i le fonotaga tele a le Pacific Islands Forum.

O le Atu Solomona le paaga numera tasi a Saina i le Pasefika ma o latou lea o le a talimalo i le fonotaga a le Pasefika ia Setema.

E 3 atumotu Pasefika e iai sootaga faalemalo ma Taiwan ae lē o Saina ma ua iai o latou popolega e ono poloka mai ai le auai atu o sui ia i le fonotaga.

Na faailoa e le Palemia o Manele i le Palemene a le Atu Solomona ua faia le faai’uga a lana Kapeneta o le a lē aofia le paaga faatalanoa a le Atu Solomona i le fono o le tausaga nei auā o le a faatino ai se iloiloga patino i atunuu o le Pasefika.

Fai mai a ia ua mae’a faailoa lea faai’uga i ta’ita’i e 18 o le Forum.

Saunoa sui mai le Itu Agai a le Atu Solomona o le faai’uga o se avanoa ua matua’i misia mo atumotu o le Pasefika e feiloa’i ai ma nisi e ono foa’ia ane ni fesoasoani mo atunuu.

Fai mai le RNZ e ui la o Ausetalia, Amerika ma Niu Sila isi paaga o loo aofia ai i paaga tetele a le Forum, ae e lē o aofia ai Beijing poo Uosigitone o se vaega o lea kulupu.

O Minisita o le Va i Fafo a le Forum o le a feiloa’i i se fonotaga i Fiti i le vaiaso fou.

Puna o Faamatalaga: https://www.rnz.co.nz/international/pacific-news/569392/solomon-islands-blocks-us-china-taiwan-from-pacific-s-top-political-meet