Fai mai le RNZ o le a lē faimalaga atu ta’ita’i o le Malo o Niu Sila i le faailogaina o le 60 tausaga o le Constitution Day lea toe tolu vaiaso ona faatino lea.
O le Kovana Sili o Dame Cindy Kiro lea o le a auai atu e fai ma sui o Aotearoa i Rarotonga.
O le aso 4 o Aokuso lea ua faailoa mai o le a faataunuu ai le faamanatuina o lea faamoemoe tāua o le atoa o le 60 tausaga e pulea e latou i latou lava ae faamalumalu ai Niu Sila.
E lē o toe po se lilo i se taimi e le’i mamao atu na taofia ai e Niu Sila le fesoasoani tau tupe e 18.2 miliona e masani ona fesoasoani ai i le Atu Kuki ina ua faailoa na sainia se maliega a le Atu Kuki ma Saina.
O le eseesega la ona o le 10 tausaga talu ai sa auai atu ai John Key o le Palemia o Niu Sila i lea taimi i le sauniga foi faapea ae o lea la i le tausaga nei ua lē malaga le alii Palemia, Christopher Luxon.
Fai mai le lipoti o loo galulue faatasi sui o malo e lua e toe faalelei le sootaga.
Puna o Faamatalaga: https://www.rnz.co.nz/international/pacific-news/566931/luxon-and-peters-to-miss-cook-islands-60th-constitution-day-celebrations
