O le vaiaso muamua o le masina fou o Iulai e amata ai ona lesitala ma faaulu sui faatutū mo itumalo faapalota e 51 o le a faia iai le filifiliga aoao a Samoa e ala i le palota tele.
O lea avanoa o le a tatala mo le 6 aso o le vaiaso e amata i le Aso Gafua, 7 o Iulai ae tapunia i le Aso Toonai, 12 o Iulai.
O le amataga o lenei vaiaso na faailoa lautele ai e le Komesina o faigāpaota lea faatulagana ina ua tuuina atu le pule faaletulafono a le Faamasinoga Maualuga e tusa ai o le fuaiupu 45 o le Tulafono o Faigāpalota o le tausaga e 2019.
Ua aiaia e le Komesina le nofoaga o le maota fono o le Tuiatua Tupua Tamasese Efi poo le TATTE i Sogi e tuuina atu iai pepa faatumu mo talosaga a sui faatutū ta’ito’atasi.
E faatinoina lea tulaga i le Aso Gafua, 7 o Iulai e oo i le ta o le 12 o le aoauli o le Aso Toonai 12 o Iulai lea e tapunia ai le faauluina o sui faatutū.
