O le faalapotopotoga o le Iuni a Europa o se tasi o paaga totino a Samoa o loo maua mai ai nisi o fesoasoani o loo maua e le Malo, ae faapea foi i faalapotopotoga tuma’oti.

O le polokalame o le Nofotane a le faalapotopotoga o le Toomaga mo ē Puapuagatia, sa faatupe e le Iuni a Europa nisi o ana polokalame e pei o le afioaga o Luatuanuu.

O le vaiaso na tea nei, na afea ai le polokalame o le Nofotane a lea afioaga e le sui o le Iuni a Europa ma lana aumalaga, e fia molimauina taumafaiga sa faatupe e le faalapotopotoga, ma o loo iai le talitonuga ua toe foi le sui o le Iuni ma se tala ave, ma toe fuafua ai nisi foai tupe e fesoasoani ai pea i taumafaiga a le Toomaga.

O le nofoaga foi o loo vaaia ai fanau sauaina le Campus of Hope sa asia e le aumalaga ma latou molimauina ai le tulaga o loo iai ia fanau a le atunuu.

O loo faagasolo sailiga seleni a le Toomaga mo ē Puapuagatia i le taimi nei, i le naunautaiga e fia faaauau pea a latou galuega fesoasoani, e le gata mo fanau ma tina ua sauaina ae faapea foi nisi o tina ma’itaga ma pepe o loo i le vaaiga a le faalapotopotoga.