Fai mai tagata Pasefika i Aotearoa o loo finau mo se manuia o o latou tagata, e lē o lava nisi o suiga ua faaagaga mo le tulafono e aofia ai asiasiga mai le Immigtation ma osofa’iga i vaveao, dawn raids.
O le matāupu lea e lē fou i le faafofoga a le atunuu aemaise o loo lipotia o tagata Pasefika lava e aga’i iai ia osofa’iga mai le vaitausaga o le 1970 ma le 1980.
Ua mae’a ona faatoese ai le faigāmalo a Niu Sila mo taimi ia o Dawn Raids sa faia ma e oo mai i ni nai tausaga ua tuana’i atu sa faatonuina ai le faia o se iloiloga lea ua afua ai ma le pili ua i luma o le Palemene e tuuina ai le i’uga o lea su’esu’ega sa faia i le iloiloga i totonu o le tulafono.
Afai ae pasia ia suiga o lona uiga o le a iai nisi siaki e mana’omia ona faia muamua a o le’i faatinoina se osofa’iga ma e tatau ona saini muamua ai se faamasino mai le Faamasinoga Faaitumalo.
Peita’i fai mai le ‘au Pasefika o loo finau i matāupu ia e lē o lava fuafuaga e pei ona faataatia mai i suiga taufaaofi, ma e lē o aveesea foi le faatinoina o Dawn Raids ae o se tasi lea o matāupu o loo finauina pea e sui mai le Pasefika e pei o lē sa avea ma faipule o le National i tausaga ua te’a, Anae Arthur Anae, ua leva foi ona finau mo faigāmalaga mai le Pasefika i Niu Sila e aunoa ma le mana’omia o ni visa.
E oo i le 60 isi atunuu o le lalolagi e mafai ona malaga mai i Niu SIla e aunoa ma le mana’omia o ni visa peita’i e leai ma se atumotu o le Pasefika o aofia ai i lea lisi.
Puna o Faamatalaga: https://www.rnz.co.nz/international/pacific-news/565807/proposed-changes-to-new-zealand-dawn-raid-laws-not-enough-pacific-advocates-say
