O fanau mai a’oga faata’ita’i, o a’oga tulagalua, kolisi ma le Iunivesite o loo faagaioia e le malo, o le a a’o’oga fua e lē toe totogia ni pili, o se tasi o fuafuaga a le vaega faaupufai o le Samoa ua Potopoto o le a latou faatino pe a tula’i mai e avea ma faigamalo i le mae’a o le palota tele.
Ua faaopoopo i lea fuafuaga ma le siitia mai le 18 miliona i le 30 miliona i le tausaga le fesoasoani a le malo mo a’oga uma a le atunuu, lea o le a fesoasoani ai foi i totogi o faia’oga o a’oga faata’ita’i ae o le a faaleleia ai falea’oga, meaa’oga, o fesoota’iga faatekonolosi ma vaega o loo faatino e asosi a mātua ma faia’oga poo le PTA.
O le Aso Lua o lenei vaiaso na faatumulia ai le faletaalo o le Multipurpose Gym i Tuanaimato i le faalauiloa o le tapenaga a le Samoa ua Potopoto o lana anavatau o le palota tele.
E lē ese ai ia tapenaga ma anavatau poo manifeso a isi vaega faaupufai ua mae’a ona faalauiloa lea ua fuafua ai foi lea vaega faaupufai a filifilia na te tauave le pulega o le malo, o le a latou faia ma faatino galuega tetele e atina’e ai le tamaoaiga ia saga mausalī ma lelei, ma ofoina foi fesoasoani i le siitia o le tamaoaiga o nuu ma afio’aga faapea le lautele o tagata.
O le penisione ua folafola e le Samoa ua Potopoto e onosefulu loa tausaga o le tagata faigaluega mālōlō litaea loa ma maua lana faamanuiaga o le penisione o le a siitia mai le 200 tālā o iai nei i le 500 tālā i le masina.
O le 60 foi lea o tausaga o le matua o le soifua o le a tala ai lea faamanuiaga mo tagata uma e aulia ia tausaga o le soifua, nai lo le 65 tausaga o loo iai nei.
Ua folafola foi i lea tapenaga le toe maua o le 20 pasene o lafoga totogi i le tausaga mo tagata faigaluega ma o le a aveesea le lafoga o le VAGST mai taumafa tuu’aisa, ma faaitiitia i le 12 pasene le lafoga totogi o le VAGST i soo se oloa.
O le a faapa’ūina foi totogi o oloa e taunuu i luga o le uafu, peita’i e lē o faailoaina mai i le anavatau pe fia se pasene o le a pa’ū ai.
O le a lē toe totogia ni lafoga a pisinisi e i lalo o le 300 afe tālā le tupe maua i le tausaga.
E 50 miliona tālā i le tausaga e faaleleia ai pisinisi, ma siitia mai le 3 miliona i le 15 miliona tālā i le tausaga fesoasoani e tuuina atu i le atina’e o taaloga.
E 5 afe eka o fanua o le malo o le a faamatuu i nuu ma afio’aga mo le galuea’ina, ma lisi atu foi ia eleele mo atina’e a aiga.
O fanau e uma lelei tuipuipui i totonu o le 2 tausaga o le a maua le faamanuiaga e 200 tālā, o le a vaai fua e aunoa ma se totogi i auaunaga tau soifua mālōlōina a le malo, tinā ma’itaga, le ‘aupenisione, ma fanau e i lalo o le 2 tausaga le matutua.
Na faaalia e le Minisita o Tupe o le malo tausi i le faalauiloa o le a mafai ona faatino uma ia fuafuaga ona o loo tulaga lelei le tamaoaiga.
Le Minisita o Tupe o le malo tausi o se sui tauva o le vaega faaupufai o le Samoa ua Potopoto afioga Lautimuia Uelese Vaai.
