O le taimi lea ua tuu e Amerika i le ta’ita’i o Lusia i le feiloa’iga sa faatalitalia lea na faatino i Alaska i le amataga o lenei vaiaso i le va o Donald Trump ma Vladimir Putin.
E ui e pei ona ta’ua i le CNN, ua aga atu nei le ta’ita’i o Ukraine, Volodynyr Zelensky i Uosigitone mo se feiloa’iga ma Trump, ae o loo faaauau pea le taua ma o le manumālō o Lusia i lea finauga o le a fuaina lea i ni nai vaiaso o lumana’i pe a mae’a le taimi ua tuuina iai e Amerika.
O le ogatotonu o Oketopa o lona uiga e lua lelei masina o le a toe tālia ai le isi laasaga i feutana’iga ae o loo faaauau pea le taua lea i Ukraine.
Ua faailoa e le sui faapitoa o le faigāmalo a Trump, Steve Witkoff o lea ua malie ane Lusia e faataga Amerika ma Europa e tuuina ni faamaoniga tau le puipuiga mo Ukraine o se vaega o se maliega o le filemu e ono iai.
Ua leva ona teena e Lusia le avea o Ukraine ma sui o le NATO ma ua faailoa e Witkoff i le lipoti a le BBC e ono iai se avanoa o le matāupu lea pe afai e taliaina e Ukraine ni aiaiga o sea maliega.
O taeao ua fuafua e faia ai se feiloa’iga a Trump ma Zelensky faapea sui mai atunuu o Europa i se isi tulaga o le a oo iai lenei matāupu.
Fai mai nisi finagalo i luga o upega tafa’ilagi, sa fai mai foi Trump o ia e mafai ona ia vave faamuta le taua lea ae o lea e foliga mai e lē faigofie ona ia faatino sea tulaga.
Puna o Faamatalaga: https://edition.cnn.com/2025/08/16/europe/alaska-summit-trump-putin-ukraine-intl
