E to’alua tamaiti, 8 ma le 10 tausaga ua maliliu ma le 17 o tagata o loo manunu’a ina ua osofa’i e se tagata se Ekalesia Katoliko i Minneapolis i Amerika a o faia se sauniga o se misasā e pei ona faamaonia mai e leoleo i le BBC.
O le Annunciation Church e aofia ai ma se a’oga sa tumu i tamaiti a’oga i le taimi na tupu ai le faalavelave ma ua ta’ua mai le 17 o loo manunu’a, e to’a 14 tamaiti ma ua lipotia ua faasolo manuia.
O le tagata na faatupuina le faalavelave e 23 tausaga o Robin Westman na maliu ai lava i le taimi o le faalavelave ma ua ta’ua e leoleo e leai ni ona tala’aga solitulafono.
Fai mai ta’ita’i leoleo o feagai ma le su’esu’ega o se gaioiga lenei ua faia ma le mautinoa faasaga i nai alo ma fanau laiti ma isi tagata sa faia a latou tapua’iga.
E lē o iloa pe ua māfua i se ā ona faatino lea osofa’iga ma o loo faatalia le i’uga o le su’esu’ega.
Ta’ua e le BBC o lē na faatinoina le faalavelave na oso ane i le pito o le nofoaga lea ma tafana atu ai nai tagata mai faamalama o le falesa.
O se molimau a se tamaitiiti e 10 tausaga le matua na faasaoina mai le faalavelave ua ia faamatala ai, na ala ona sao mai ona o si ana uo sa taoto i ona luga e pupuni o ia mai pulufana.
Na lavea si ana uo peitai e foliga ua togafitia i le falema’i ma faasolo ina manuia.
Saunoa le Peresetene Donald Trump o le a faa’afa le fua a le malo tele e faailoa ai le faaaloalo i soifua ua ma’umau mai lenei faalavelave.
Puna o Faamatalaga: https://www.bbc.com/news/articles/c7760x87r4po
