Ua taliaina e Amerika le vaalele lea na faameaalofa ane e Qatar ma afua ai nisi o faitioga mai nisi o le aulagolago a le Peresetene Donald Trump.
O le vaalele ua tuuina atu i le auaunaga a le Air Force1 lea e feavea’ia le Peresetene ma o le ituaiga Boeing 747 ma ua taliaina aloa’ia e le failautusi o le puipuiga a Amerika.
O loo maumaua’i le Fale Pa’epa’e o le meaalofa ia o loo ogatasi ma le tulafono peita’i o le faalauiloaina mai o lea meaalofa i le vaiaso talu ai ua afua ai le tele o le mau faitioga.
O le vaalele o se meaalofa mai le aiga tupu a Qatar ma pe ā ma le 400 miliona le tau ae iai vaega e mana’omia ona faaopoopo iai auā le malupuipuia mo le feavea’iina o le Peresetene.
O i la lea o loo faitio ai nisi ona e foliga e oo atu foi i le piliona isi tupe e faaalu ai i ia fetuuna’iga ma o loo iai foi se vaega o le faavae o le atunuu o loo faasā ai meaalofa e tuuina i tulaga tofi o le malo mai isi atunuu e aunoa ma se ioega mai le konekeresi.
O le finau a le Peresetene, o le vaalele o loo foa’i ane i le matāgaluega o le puipuiga a le atunuu ae lē mo ia ma o le a ia lē faaaogāina foi pe a mae’a lona taimi i le tofi Peresetene.
E lua vaalele a le Air Force 1 o loo iai i le taimi talu mai le 1990 o loo faaaogā mo le feavea’iina o le Peresetene.
Puna o Faamatalaga: https://www.bbc.com/news/articles/cq855lx87z3o
