Ua faailoa ane e Amerika nisi fuafuaga fou mo le faamutaina o vevesi i Sasa’e Tutotonu ma e aofia ai i ia fuafuaga le faasa’oloto loa o i latou na ave faapagota o taua ma ia amata loa feutana’iga mo le faamutaina o le taua i lea itu o le lalolagi, o se faamatalaga lea mai ni sui se to’alua o Isaraelu na faatalanoa e le CNN.
Fai mai o ia fuafuaga ua mae’a faailoa atu i le Hamas ma e lē o mailoa i le taimi nei poo ia fuafuaga o se faasologa o ni ta’iala mo le amataina o feutana’iga pe o se fuafuaga atoa foi mo le faamutaina o le taua.
Ua faamaonia mai e le Hamas lo latou mauaina o ia fuafuaga a Amerika ma i se pepa o faamatalaga ua o latou faailoa ai latou te taliaina soo se gaioiga e fesoasoani i le taofia o sauāga o loo faia faasaga i o latou tagata ma ua faailoa ane ai foi lo latou naunauta’iga ua sauni e nonofo i le laulau o feutana’iga e faatalanoa le faasa’olotoina o pagota Isaraelu aemaise o le faamutaina loa o le taua.
O loo feta’ua’ina i le lipoti o fuafuaga ia a Amerika o loo aofia ai ma le valaau i le Hamas e faasa’oloto ane uma pagota e 48 a Isaraelu i le aso muamua o le maliega ae o le a taofia uma e Isaraelu ana osofa’iga i Gaza.
O lalo foi o ia fuafuaga ua faatulaga ai feutana’iga e faia i le va o Isaraelu ma le Hamas mo le taofia loa o vevesi i lea faaitu.
E foliga mai i lipoti o loo fiafia foi Isaraelu i fuafuaga ia mai ia Amerika ma o loo faatalia la le tulaga o le a oo iai ia fetuuna’iga.
Puna o Faamatalaga: https://edition.cnn.com/2025/09/07/world/mideast-ceasefire-israel-gaza-hostages-negotiations-intl
