Ua faailoa le lē fiafia o le Peresetene o Amerika i le maliega i le va o Isaraelu ma Iran lea na ia folafola i le aso ananafi ua taofia ai fetauiga peita’i sa iai lipoti i le televise i le po anapo e foliga na toe iai foi nisi fetauiga i le va o atunuu e lua ae e lē o faamaonia ia lipoti mo le taimi nei.

Peita’i a o le’i aga’i Trump e auai i le fonotaga a le NATO i Netherlands sa ia faailoa lona lē fiafia aemaise lava ia Isaraelu.

Ua mae’a ona faailoa uma e Isaraelu ma Iran o le a o laua lē solia le maliega ua faia e taofia ai fetauiga.

Ua mae’a faailoa e Danny Danon o le amepasa o Isaraelu i Malo Aufaatasi o le a malosi le tali atu a Isaraelu pe afai e solia le maliega ua iai nei ma Iran ae ua faailoa foi e le amepasa o Iran i Malo Aufaatasi, Amir Saeid Iravani le latou faafetai ia Qatar ma lona sao i le maliega lea ua iai nei.

O osofa’iga a Amerika i nofoaga tau niukilia e tolu a Iran ua agiga lipoti i le asō e foliga e lē o matua’i faaleagaina ai le ogatotonu o ia polokalame faaniukilia peita’i o loo faatalia se faamautūina mai o le i’uga o lea su’esu’ega.

O le lē fiafia o Trump ia Isaraelu ua ta’ua e le CNN na faailoa i sana faamatalaga na faia i le social media ua una’ia ai Isaraelu ina ia taofia le osofa’ia o Iran ma toe faafoi ane ana pailate i fanua.

Puna o Faamatalaga: https://edition.cnn.com/world/live-news/israel-iran-conflict-us-trump-06-24-25-intl-hnk