Ua osofa’i e Amerika nofoaga faaniukilia e tolu a Iran i se osofa’iga fai mai le failautusi o le puipuiga a Amerika o Pete Hegseth, ua matua’i faaleagaina uma ai taumafaiga faaniukilia a Iran.

Fai mai le CNN o le osofa’iga a Amerika ua faaigoa o le Operation Midnight Hammer na aofia ai vaaleletau e 125 ma vaalele o B2 Bombers e pei ona faamaonia mai e sui o Amerika.

Fai mai o ituaiga pomu e faaigoa o Bunker Busters na faaaogā i nofoaga e pei ona ta’ua faapea Tomahawk Missiles.

O loo lipotia le tali mai a le Minisita o le Va i Fafo a Iran ma tuua’ia ai Uosigitone ua o latou kolosia le laina ma faailoa a latou faitioga e tusa o le gaioiga a Amerika.

O loo faaali pea se faamatalaga mai lo latou ta’ita’i Ayatollah Khamenei ae ua lapata’i ane foi ma Trump e ono toe iai nisi osofa’iga faaopoopo a Amerika ia Iran pe afai e lē gaioi ane mo se filemu.

Tau fai faatalitali le to’atele poo le ā nei le isi laasaga o le vevesi lea i Iran ae poo le ā foi se tali ane a lea atunuu i le tulaga ua tula’i mai.

Puna o Faamatalaga: https://edition.cnn.com/world/live-news/israel-iran-conflict-06-22-25-intl-hnk