Ua alia’e le mau ata ma videos na pu’eina i le taimi na tupu ai le faalavelave i Utah i Amerika lea na fasiotia ai se tasi o tagata faasalalau ma o se lagolago malosi foi a Trump, o Charlie Kirk.
Na fana e le tagata i le Utah Valley University a o faia sana tautalaga i lea nofoaga.
Na faamaonia mai e le Peresetene o Amerika, Donald Trump ua maliu Kirk ma faailoa foi e le FBI e iai le tagata ua masalomia i le faalavelave lea ua o latou taofia mo su’esu’ega.
Ua faailoa foi i lipoti a le 9News e lē o iai se lamatiaga i le Iunivesite a o faaauau ai le su’esu’ega.
O lē ua maliu, Charlie Kirk 31 tausaga sa sologa manuia ana polokalame faagasolo i luga o leitio aemaise upega tafa’ilagi ma e tele foi ana polokalame e faia i nofoaga lautele e una’ia ai le lagolago ia Trump aemaise foi o a’oga maualuluga ma Iunivesite.
E mātele ana polokalame ma faasalalauga i tupulaga talavou.
Winston Peters:
O lenei lava faalavelave na faaalia ai se manatu o le sui ta’ita’i o le faigāmalo sosoo o loo iai nei, le susuga Winston Peters i luga o le social media e faapea, o se tulaga mata’utia ona ua tatou ola nei i se lalolagi ua faaaogā fana e tali atu ai i le eseese o manatu ma talitonuga o tagata.
O le maliu o Charlie Kirk e lē o ni sauāga faapolotiki ae o se tasi ua tagatavaleina.
O le itu e sili ona mata’utia ona sa faimalaga taamilo atoa Kirk i nofoaga eseese o iunivesite, e fai ana faasoa tatala ma tagata ta’ito’atasi ma o ni faatasiga e talia ai tagata uma.
Sa finau lava lenei alii mo le sa’olotoga e faaali ai manatu ma faaleo lagona, aemaise lava sa finau malosi Kirk mo le aiā sa’oloto a tagata uma, e tusa lava pe na te le’i taliaina na manatu.
Saunoa Winston, ua lamatia le tāua o le faatemokalasi i le lalolagi atoa, ma ua tatau ai ona tatou faia mea uma e puipuia mai ai le faaleagaina o le faatemokalasi.
Puna o Faamatalaga: https://www.9news.com.au/world/charlie-kirk-assassination-pro-trump-activist-media-personality-shot-dead/efa66348-ea8c-43a2-ae28-7f7ca5620ab0
