Ua faifai tetele le matāupu i Los Angeles i Amerika ina ua faailoa mai e se lipoti aupito lata mai a le CNN, le amata ona tapu’e ma taofia e leoleo tagata o loo auai i solo tetee ua tolu nei aso o faaauau pea i magāala o Los Angeles aemaise o le faamatuu ane o le tusa ma le 2,000 o sui o le National Guard a le atunuu e fesoasoani i le matāupu lea.
O le maliega na sainia e Trump i le taimi ua sola ua valaau ai i le National Guard mo le latou puipuiga ua faailoa i lipoti o le uluai taimi lea ua valaau ai se peresetene e faatino lea tulaga e aunoa ma se ioega mai le setete. Mai lava i le faai’uga o le vaiaso talu ai na lipotia ai le tumutumu o magāala o le aai i tagata na auai i solo tetee ma e tele foi mea ua faaleagaina ai.
Ta’ua e le pulenuu o Los Angeles, Karen Bass i le lipoti lea o LA o se aai o tagata na faimalaga atu i Amerika ma e taliaina uma soo se tasi e tusa lava poo fea e aga’i atu ai ae o le itu tāua ia nofo filemu.
Saunoa foi Kamala Harris, o lē sa avea ma sui peresetene talu ai ma o se sui foi o le setete o Kalefonia, na te teena foi le valaauina o le National Guard i le matāupu lea ma na te lagolagoina le faitau miliona o tagata Amerika o loo faaleo o latou lagona mo le puipuia o a latou aiātatau ma sa’olotoga.
O le matāupu lea na afua mai i osofa’iga ma su’esu’ega tau le pulega a le ofisa o femalagaa’iga sa faia i nofoaga eseese i le aai mo le sa’ilia o tagata o loo aumau faasolitulafono i lea itu o Amerika.
Puna o Faamatalaga: https://edition.cnn.com/2025/06/08/politics/trump-national-guard-decision
