Ua faia le faai’uga a le Faamasinoga o Fefaataua’iga faavaomalo le Court of International Trade, e faapea o se tulafono faavavave sa faataga mai e le Fale Pa’epa’e e lē faatagaina ai pe tuuina ai se pule e faia ai tariffs poo totogi faaopoopo i soo se atunuu.

Ua faailoa ai la ua ova atu le laasaga ua oo iai Trump i ana faiga tariffs sa faia nai lo le tulaga e tatau ona au iai lana pule.

Fai mai le faamasinoga o le Faavae o Amerika e tuuina ai le malosi’aga tutasi i le konekeresi e faatonutonu ai tulaga tau le tamaoaiga faatasi ma isi atunuu ma e lē sili atu la se malosi’aga tau le Peresetene.

Ua ta’ua e le BBC e le’i pine ona faailoa ane lea i’uga ae faaulu loa ma le apili a le faigamalo a Trump.

O le tagi e faatatau i le matāupu lea na faaulu ane e le Liberty Justice Centre e fai ma sui o ni pisinisi laiti se 5 e latou te aumaia oloa mai isi atunuu.

O loo tulimata’ia e le to’atele le isi sitepu i le faagasologa o lea matāupu pe toe ono suia ma aveesea ai le mau tariffs ua tuuina e Amerika i le tele o atunuu o le lalolagi.

Puna o Faamatalaga: https://www.bbc.com/news/articles/c8xgdj9kyero