Ua faailoa mai nei e le Peresetene o Amerika Donald Trump ua iai ana fuafuaga e tuuina foi nisi totogi faaopoopo poo tariffs i oloa e faaulufale atu i amerika mai atunuu e 14 e aofia ai ma Iapani ma Korea i Saute.
Fai mai leBBC ua folafola e le peresetene le tuuina o le 25 pasene o ia totogi faaopoopo i luga o oloa mai Iapani ma Korea i Saute atoa ma tusi ua tuuina i isi atunuu ua lapataia ai e tatau ona amata faamamalu lea tulaga i le aso 1 o Aokuso.
O le finau lava a le Peresetene o le faia o nei tariffs o le a puipuia ai pisinisi Amerika mai faiga faatauvaga ma pisinisi i fafo ma faatupulaia ai ma auaunaga gaosi oloa i totonu o le atunuu faapea foi ma avanoa faigaluega. Ua faailoa e nisi o i latou atamamai i mataupu ia tau le tamaoaiga, economist, ua ta’ua ai o lea faiga o le a siitia ai le tau o oloa i Amerika ma faaitiitia ai ma fefaatauaiga.
Mo le taimi nei ua mae’a ona faia se maliega a Amerika ma le UK faapea Vietnam atoa ai ma se vaega o se maliega ma Saina ma ua faailoa foi e Amerika ua lata foi ona mautu mai le maliega o loo fetuunai ma Initia.
Puna o Faamatalaga: https://www.bbc.com/news/articles/cd0vkl31085o
