Ua lipotia mai e le CNN ua faia nei se iloiloga e le faigāmalo a Peresetene Trump, o le maliega sa faia i le taimi o Peresetene Joe Biden ma Ausetalia i lalo o le maliega tau le puipuiga a le AUKUS lea e aofia ai ma Peretania e faataga ai Ausetalia ona maua ana vaamaulu niukilia.
O se faamatalaga lea mai se sui o le vaega o le puipuiga a Amerika sa faia ane i le CNN ae e silasila Ausetalia i le maliega lea e ta’ua tele i le itu tau le puipuiga le maua mai o vaamaulu ia ma o loo mautū pea le manatu ina ia faataunuuina lea poloketi o loo galulue faatasi ai ma le malo tele.
Fai mai le sui lea mai Amerika afai e iai ni suiga pe a mae’a le iloiloga o le a faailoa mai lava i vaega uma o loo aofia pe afai e talafeagai.
O le AUKUS sa amata faavae mai i le 2021 e faagaioi ai popolega o Amerika, UK ma Ausetalia i le faatupula’ia pea o le malosiaga o Saina.
Ua ta’ua foi i le lipoti lea a le CNN se faamatalaga mai se sooupu a le vaega o le puipuiga a Ausetalia ua ta’ua ai ua mae’a faailoa mai e Amerika ia Ausetalia ma le UK o le a faatino le iloiloga e pei ona ta’ua.
O le AUKUS o le poloketi aupito tele lea tau le puipuiga ua auai ai Ausetalila ma e oo atu i le $368 piliona tala Ausetalia ua fuafua e faaalu ai i totonu o le 30 tausaga o lea poloketi.
Puna o Faamatalaga:ehttps://edition.cnn.com/2025/06/11/australia/trump-reviewing-aukus-submarine-pact-latam-intl
