O loo tulituliloa lava e nisi le matāupu a Trump ma le alii aupito mau’oa i le lalolagi o Elon Musk lea ua lipotia mai e le BBC i le asō ua faamata’u e Trump faiga pisinisi a Musk ma le faigamalo lea o loo ta’ua o loo fesoasoani tele i lana polokalame o le SpaceX.
Saunoa ai Trump o le auala faigofie e faasao ai tupe mai le Budget poo le tala faatatau o le tupe, o le faalēaogā lea o konekarate a Elon Musk i le malo.
Ta’ua i le lipoti se faamatalaga a le alii pilionea ua valaau ai ua tatau ona molia Trump i le tulafono pe afai ae aveesea tupe o loo fesoasoani atu ai i ana kamupani.
Faailoa foi e Musk o loo faamoemoe Amerika i ana vaalele e feavea’i ai le ‘ausu’esu’e i le vanimonimo.
O loo ta’ua i le lipoti o se feeseesea’iga na afua mai lava i le kamupani taavale a Musk le Tesla lea e iai ni ona aafiaga i nisi o fetuuna’iga e faatatau i lafoga totogi.
Faailoa finagalo o nisi o le ‘aumātau o lea la ua amata ona aliali faala’uaitele le eseesega o finagalo o le alii Peresetene o le malo tele ma le tagata aupito mau’oa i le lalolagi lea sa tutū faatasi i le taimi o le faigāpalota a le atunuu ma ua tau aliali ane ai ma nai isi matāupu e faatatau lava i le to’alua lea atonu o le a tau manino i le lumana’i pe afai o le a faaauau pea ona faateteleina le matāupu a Trump ma Musk.
Puna o Faamatalaga: https://www.bbc.com/news/articles/c3wd2215q08o
