Ua amata i le vaiaso nei suiga fou i aiaiga o visa asiasi i Niu Sila mo tagata o le tatou atunuu o faamautū i Samoa, ae o ni suiga ua aofia ai ma atunuu o loo avea ma sui o malo o le Pasefika le Pacific Forum.
Ua faailoa lautele e le vaega o femalagaa’iga i le ofisa o le Komesina Maualuga o Niu Sila i Samoa le amatalia o ia suiga i visa asiasi uma e amata maua i le aso 6 o le masina nei o Iulai.
E ono mafai ai ona maua le 6 masina i se visa asiasi e nofo ai i Niu Sila ae mafai ona toe faaopoopo se isi 6 masina pe a toe talosaga i se isi visa asiasi a o iai i Niu Sila.
O le maua o lea aofa’iga o masina i se visa asiasi poo se visa tafao e faalagolago i le faamalieina uma o aiaiga o le talosaga.
Ua iai nei se ofisa mo auaunaga tau visa ua latou faagaioia talosaga uma ma ua lē toe afea ai le ofisa o le Komesina Maualuga o Niu Sila e pei ona sa masani ai.
O le ofisa fou lea o loo i le maota o le Sanalele complex i Taufusi.
