E 13 molimau a leoleo ua amata tuuina atu a latou mau tuu fofoga e lagolago ai le moliaga o le fasioti tagata faamoemoeina o loo tuua’ia ai Papalii Sia Figiel, o se tama’ita’i e iai ona tomai i le tusia o solo ma tala fatu.
Ua savalia nei i le tausaga ma le 3 masina tau ona tula’i mai le solitulafono i Vaivase uta i le fale o lē ua molia, na maliu fasia ai le tama’ita’i 78 tausaga le matua o Utulei i Amerika Samoa o Dr Caroline Sinavaiana Gabbard ma molia ai e leoleo Papalii Sia Figiel.
I le folasaga amata a le loia a leoleo sa ia faailoa ai i le faamasinoga faamaumauga a leoleo i le mea na tupu, lea e faapea o le Aso Faraile 24 o Me o le tausaga na te’a nei na aga’i ane ai i lana taavale mai Siusega lē ua maliu ma aga’i i le fale i Vaivase uta o lē ua molia.
O le aso lea na faatino ai e Papalii le gaioiga na maliu ai Dr Caroline e pei ona sa ia faaaogā ai ni ‘au’upega se lua o se naifi ma se samala se’i tulou.
Na mae’a lea ona tuua lea e lē ua molia lona fale ae alu i Vavau i le taavale a lē ua maliu ma nofo ai i le po i se fale apitaga tu matāfaga.
O le Aso Toonai na sosoo ai na alu ai i sona tauaiga i Lotofaga ma tofa ai se’ia oo i le taeao o le Aso Sa 26 o Me 2024 ma ia faamatala loa i nisi o lona aiga le mea na tupu, ma faapena ona logoina ai leoleo.
E tuua e lē ua molia lona fale ma aga’i ai i Vavau ma Lotofaga o loo iai pea i lona fale i Vaivase uta lē ua fano le soifua.
O le leoleo na pu’eina ata o le nofoaga na tupu ai le solitulafono faapea ata o le tino maliu ina ua taunuu i le falema’i na amata ai molimau a leoleo, ma o loo faagasolo pea lenei su’esu’ega ma le faamoemoe o le a iai nisi o molimau e faia mai atunuu mamao e faaaogā ai auala o fesoota’iga televavave.
E fā aso o loo faatulaga e su’esu’eina ai molimau o lea matāupu tau faamasinoga e pei ona tula’i le tama’ita’i loia o Unasa Iuni Sapolu mo lē o loo molia, ae o le tama’ita’i loia galue tuto’atasi o Leinafo Taimalelagi Strickland o loo finauina moliaga a leoleo.
O loo molia Papalii Sia Figiel i le moliaga e tasi o le fasioti tagata faamoemoeina, tasi le moliaga o le fasioti tagata pa’ivalea, le moliaga e tasi o le faaoomanu’a tugā, ma le moliaga o le umia o ni ‘au’upega mata’utia.
O loo tetee Papalii Sia Figiel i moliaga uma a leoleo.
