O le Aso Lulu le ogatotonu o lenei vaiaso ua amata savalia ai e le vaega faaupufai o le Samoa ua Potopoto itumalo faapalota i Upolu o le a tauva ai o latou sui faatutū e sefuluvalu, ae taualuga atu i Savaii o le a tausinio ai o latou sui faatutū mai itumalo e valu.
O itumalo faapalota o Siumu ma Falealili 1 o le a afea i le faalauiloa a lea vaega faaupufai i lenei Aso Lulu i Samoa e pei ona faailoa i upega tafa’ilagi a le Samoa ua Potopoto.
Ua faailoa ai foi e lea patī faaupufai i lana upega tafa’ilagi e sesē ma lē sa’o ni faamatalaga ua faasalalau e nisi ua ta’ua le iai o se tapu a le itumalo o Lotofaga i le faia ai o ni faalauiloa a isi vaega faaupufai.
Ua faailoa e le ta’ita’i o lea vaega faaupufai le afioga Fiame Naomi Mataafa i le upega tafa’ilagi a le latou patī, o le filifiliga a lona itumalo faapalota ua tatala ma e lē o se faiga amiotonu le taofia o aiā tatau o tagata tauva e faatino ai faalauiloa mo le palota tele a le atunuu.
E to’alua isi sui tauva mo le tofi faaolioli o Lotofaga o le a tausinio ma le afioga i le Sa’o Faapito, o le sui tama’ita’i mo le vaega faaupufai o le Faatuatua i le Atua Samoa ua Tasi le afioga Fuimaopoao Taliilagi Beth Onesemo ma le tofa Fiaola Iosua Lole o se sui e tauva tuto’atasi.
I le vaega faaupufai e puipuia aiā tatau a tagata sa molimauina le oo atu o le latou faalauiloa i le itumalo o Safata i le Aso Lua ae o le Faatuatua i le Atua Samoa ua Tasi o le faletaalo o le multipurpose gym i Tuanaimato na amata ai ana faalauiloa mo Upolu ina ua mae’a mai le motu o Savaii.
O itumalo o Faleata 1, Faleata 2, ma Faleata 3 sa tuufaatasi le latou faalauiloa i lea faletaalo ma o le afiafi na faia ai, ona o le taimi lea ua to’atele ua mānava mai galuega.
