A o faasolo pea tapenaga a Samoa mo lana taligamalo i le fonotaga a ta’ita’i o Malo o le Taupulega o loo loma nei, ua amata faasolo ai nei nisi o tapenaga i itu tau pesepesega ma faafiafiaga e pei ona faasalalau ai e se tasi o kamupani ua ta’ua o le SolFa Music Samoa le sailia ai o nisi e auai i lenei avanoa e auai ai mo ia tapenaga.
Mai lea faasilasilaga o loo faailoa ai le aofai o tagata sisiva ma tagata pepese o loo tau sailia i le taimi nei.
Mo le siva, ua faamauina e sefulu avanoa mo alii ma le sefulu avanoa mo tamaitai o loo tau sailia, ma i tuutuuga o le faia ai o sailiga o le tapena ai e i latou e agai atu o sana siva samoa.
I itu tau pesepesega e 19 avanoa mo le vaega o le ī poo le soprano, 12 avanoa o le oloto, 12 le ato poo le tenor ma le 17 avanoa mo le malū poo le bass.
Ae o tuutuuga e saunia e le tagata sana pese e 1 agai i le 2 minute e na te lagiina.
O loo faapena ona tatala foi le avanoa mo ē e iai le taleni o le ta pātē ma le fala, e aofia i lea sailiga, ma e 4 avanoa o loo tau sailia ai nisi.
O le aso 7, o le Aso Lulu i le ofisa tutotonu o le SolFa Music Samoa i Tuanaimato o le a faatino ai lea faamoemoe, ma e mai le itula e 3 agai i le itula e 6 i le afiafi.
Mo le silafia o lenei sailiga ua ta’ua o le Voices of Samoa General Audition, ma o loo tuufaatasia e le SolFa Music Samoa mo tagata lautele ina ia auai i le aufaipese tele mo le “The Commonwealth Resounds”, i lea faamoemoe tāua.
O le SolFa Music Samoa, o se faalapotopotoga e agai tonu lana auaunaga i le fesoasoani i itu tau musika.
