O le potu mo fonotaga tetele i le maota o Tui Atua Tupua Tamasese Efi i Sogi ua avea ma nofoaga e faatino ai le galuega a le Komesina ma le ofisa o le komisi o faigāpalota, e faagaioi ai le faauluina ma le lesitala o sui faatutū o le faigāpalota tele a le atunuu ia Aokuso.
Ua faailoa e le ofisa o faigāpalota i lana fesoota’iga faaonaponei le to’atele o sui e ‘au i le 40 ma ona tupu ua mae’a lesitala i le aso muamua o le galuega, lea na amata i le Aso Gafua o lenei vaiaso.
O ata o loo faasalalau i le fesoota’iga a le ofisa o le komisi o faigāpalota ua molimauina ai le mae’a lesitala o le ta’ita’i o le vaega faaupufai o le Faatuatua i le Atua Samoa ua Tasi lea ua faaaogā ai lona suafa o le Laaulialemalietoa e pei ona faamautū i se faai’uga a le Faamasinoga o Fanua ma Suafa talu ai nei.
O nisi foi o sui faatutū o lea patī faaupufai ua mae’a lesitala i le aso muamua o lea vaega tāua o tapenaga o le palota tele, faapea nisi o sui faatutū o le vaega faaupufai e puipuia aiā tatau a tagata.
I le nofoaga autū o le vaega faaupufai o le Samoa ua Potopoto o le Aso Gafua sa amata faamautū ai ona sui faatutū ma tapenapena ai mo le lesitalaina aloa’ia i le ofisa o faigāpalota.
O le galuega o le lesitalaina o sui faatutū ua faagasolo o le a mae’a i le Aso Toonai o le vaiaso nei.
