O le aso lenei, Aso Gafua, 8 Setema 2025 lea o le a faagasolo ai i le Faamasinoga Maualuga i Aukilani, le faamasinoga o le tama’ita’i o Hakyung Lee i moliaga o lona fasiotia faamoemoeina o lana fanau e to’alua ma tuu ai o la tino maliliu i totonu o ni atopa’u.
O le faalavelave lenei na alia’i mai i le tausaga e 2022, lea na maua ai e se aiga na latou faatauina mai ni atopa’u mai se faatautu’i na faia i luga o le initaneti, ae o latou maua ai toega nei o tino maliliu o nei fanauiti e valu ma le ono tausaga le matutua.
O Lee ua avea o se tagatānuu Niu Sila, ma na maua ma taofia e leoleo i Korea i Saute ia Setema o le 2022, ma i le lua masina mulimuli ane na toe aumai ai i Niu Sila lenei tama’ita’i e tusa o se poloa’iga a le faamasinoga ina ia tu i luma o le faamasinoga i ona moliaga i lenei soligatulafono.
Sa tetee Lee i moliaga e lua o le fasioti tagata faamoemoeina, ma maumaua’i lava i lana tali tetee lea i le taimi atoa o loo faagasolo lona faamasinoga.
Sa taofia le faailoa faalaua’itele o le igoa o lenei tama’ita’i ae o le 2023 na faato’ā teena ai loa e le faamasinoga lena talosaga mo le taofia o le faailoa o le suafa o Lee se’ia oo mai lava i le taimi nei.
O nisi o faamaumauga a le faamasinoga e pei ona lipotia e le RNZ o loo faaalia ai, o le 2017 na maliu ai le to’alua o Lee, ae a o le’i maliu le tamāloa sa iai ni faamatalaga taufaamata’u a Lee e faapea e na te fasiotia o ia toe fasioti ma lana fanau pe a i’u ina maliu lona to’alua.
E lē o māua i faamatalaga a le faamasinoga poo le ā tonu le auala na faaaogā e fasioti ai tamaiti, ae iai le talitonuga, o ni fualaau sa faaaogā e Lee e mafai ai ona moe, ma e lē tatau ona faainu ai ni tamaiti, atonu sa faaaogā e Lee e faainu ai lana fanau ina ua i’u lava ina maliu lona to’alua mai se gasegase faaumiumi na feagai ai.
E masalomia na ia fasiotia tamaiti i le faai’ui’uga o Iuni ma le faai’ui’uga o Iula 2018.
O lenei faamasinoga sa faatulaga e valaau i le tausaga talu ai, 2024, ae na toe tolopo, ma o lea ua faatulaga ai loa mo le asō.
Puna o Faamatalaga: https://www.rnz.co.nz/news/national/572378/bodies-in-suitcases-murder-trial-to-begin
