E lē o mapu le auaunaga fesoasoani a le Ekalesia a Iesu Keriso o le Au Paia o Aso e Gata ai e ala i lona aao mafola e faatino ai foa’i mo le matagaluega o le soifua mālōlōina i lo tatou atunuu.
E 90 moega mo gasegase ua faameaalofa e le ekalesia e lagolago atu ai i le pitolaau a le Malo e ala i le matagaluega o le soifua mālōlōina, e pei ona o le a tuuina atu moega i falema’i i Upolu ma Savaii.
E pei ona silafia o le tasi lea o ekalesia i Samoa e lē gata ina latou faia foa’i faapea mo le auaunaga a le soifua mālōlōina o loo tautuaina le atunuu atoa, ae o loo faamauina foi le lima foa’i i nisi o fesoasoani mo a’oga, ma faalapotopotoga o loo galulue mo le lelei o isi tagata soifua.
Na foa’i foi nofoa faataavalevale ma totoga e fausia ai aao faapipii ma isi vaega tāua ma le aogā auā le faafaigofieina o feoa’iga a le mamalu o le atunuu mo tagata e iai mana’oga tumau o le soifua.
O le Minisita o le matagaluega, le afioga Valasi Luapitofanua Toogamaga Tafito Selesele sa fai ma sui o le Malo e momoli le faafetai i ta’ita’i o le Ekalesia a Iesu Keriso o le Au Paia o Aso e Gata ai ona o le agalelei e lē o tuu aunoa ai le afea o le soifua mālōlōina ia latou fesoasoani.
O moega o nisi ia o oloa taugatā e mana’omia e gasegase peitai o le faamāmā avega tele ua iai le foa’i o moega e 90 mai lea ekalesia i Samoa.
