O le sui o le Malo o Samoa i totonu o le teritori o Amerika Samoa le afioga i le Konesula le tofa Fata Brian Kaio sa faafeiloa’ia le tasi o vaega o tagata faigaluega mai Samoa Tuto’atasi, ua maua avanoa e galulue ai i le kamupani tuuapa i’a o le Starkist i Tutuila.
E pei ona faailoa ai i le upega tafa’ilagi a le ofisa o le Konesula o le Malo o Samoa i le teritori, o lea feiloa’iga sa ave ai le faamalosi’au a le Konesula i le aufaigaluega o alii ma tamaitai, aemaise o upu apoapoa’i ma fautuaga ina ia tautuana le amio pulea ma le amio tausaafia a o valavala ai ma aiga ma nuu ona o galuega auā sa’iliga manuia i seleni mo le atina’e o aiga.
O maliega i le va o Malo e lua i le mafutaga a ta’ita’i le Atoa o Samoa o loo iai avanoa faigaluega ua ofo mai e le kamupani o le Starkist mo tagatānuu o Samoa.
O se tasi o fesoasoani i tupe maua mo aiga ae o loo manuia ai foi le tamaoaiga o Amerika Samoa i oloa o apa tuna o loo faatau i maketi i le Iunaite Setete.
Faaalia i le faasalalauga mai le ofisa o le Konesula o le malo o Samoa i le teritori, e lata i le 50 pasene o oloa tau apa tuna e gaosi e le kamupani tuuapa i’a o le Starkist.
