O lea ua amata galue o se Faamasino o le Faamasinoga Maualuga mo se vaitaimi le afioga i le Faamasino o le Faamasinoga Faaitumalo le afioga Loau Le’afa Aukusitino Donald Kerslake, ina ua mae’a ai ona faatauto i luma o lana afioga i le Ao o le Malo i se sauniga faapitoa a le faamasinoga, sa faia i le maota faalemalo o le Ao Mamalu o le Malo i Vailele.
O le amataga o lenei vaiaso e tauaofia ai le faamasinoga o faigāpalota mo le amata fofogaina o tagi o loo lu’i ai agavaa o nisi o sui faatutū o le faigāpalota o loo loma a le atunuu faapea ma lu’i i le agavaa i aso e tatau ai ona nofo mau i Samoa.
O su’esu’ega o ia matāupu e to’alua Faamasino o le Faamasinoga Maualuga e tauaveina e pei o isi taualumaga a le faamasinoga o faigāpalota sa faatino a o lumana’i le palota tele o le tausaga 2021 faapea le mae’a o lea faigā filifiliga a le atunuu.
O se tasi lea o mafua’aga o le filifilia o lea Faamasino o le Faamasinoga Faaitumalo e galue mo se taimi i le Faamasinoga Sili a le atunuu.
O isi faamasinoga e fesoota’i i le faigāpalota tele o tagi o ni faiga faatosina solitulafono e ono faaulu pe a mae’a le faigāpalota i le aso 29 o le masina fou o Aokuso.
