O le faai’uga o le vaiaso sa amata faga ai lotoā ma nofoaga o iai falea’oga i le motu o Upolu, ma o se tasi lea o galuega ua matuā ave iai le malosi o le matāgaluega o le soifua mālōlōina ae lagolago iai isi matāgaluega a le malo.
Ua faailoa e le Ofisa Sili o le pulega o le matāgaluega o a’oga ma aganuu e 44 falea’oga na oo iai le galuega i le Aso Toonai na te’a nei, ae o loo ave le fautuaga a le Ofisa Sili le afioga A’eau Chris Hazelman i pule ma komiti o a’oga ina ia tatala faitoto’a o pa o lotoā ma potu a’oga e ulufale iai le aufaigaluega.
E mafua lea fautuaga ona e iai lotoā sa afea i le faai’uga o le vaiaso i le galuega ae o loo loka pa ma potu.
Le Ofisa Sili o le matāgaluega o a’oga ma aganuu afioga A’eau Chris Hazelman i se saunoaga faalaua’itele mo a’oga uma a le atunuu o le a afea i le galuega i lenei vaiaso.
E 15 vaega poo teams o le a faatinoina le galuega i lenei vaiaso fou o le faga lea o lotoā ma potu a’oga, ma a mae’a Upolu ona faasolo lea i le motu o Savaii.
O le vaiaso nei ua tapunia uma ai a’oga i le atunuu amata mai i a’oga faata’ita’i e oo i le Iunivesite Aoao a Samoa a o faia galuega mo le puipuiga o le atunuu mai le pepesi o le dengue fever poo le fiva o ponaivi.
Ua ave ai ma le tuualalo a le Faatonu Sili o le matāgaluega o a’oga ma aganuu i le pulega o le Iunivesite o le Pasefika i Alafua ia silasila i le saogalemu o tagata uma mai le faama’i ma galuega ua faatino ina ia tafa se finagalo e tapunia foi a’oga uma a lea iunivesite.
O ata a nisi sa pu’e mai le falema’i o tamaiti i le maota gasegase i Motootua sa salalau i le api o foliga ua molimauina ai le faatumulia o lea vaega o le falema’i i nisi o mātua ma o latou alo ma fanau ua sulufa’i atu mo togafitiga ona o āuga o le fiva o ponaivi.
E to’alua fanauiti ua faamauina ua fano ola e mafua o āuga o le fiva o ponaivi talu mai le masina o Ianuari o lenei tausaga.
I galuega o le tausia o le tumamā lautele, o le faai’uga o le vaiaso na amata faatino ai i le atunuu atoa le faamamāina o nuu ma afio’aga.
O sui o nuu ma sui tama’ita’i o nuu ma afio’aga sa ave iai le faatalauula a le Matāgaluega o Tinā ma Tama’ita’i, Atina’e o Afio’aga ma Aga Fesoota’i e galulue faatasi ma tagata uma o nuu e faatino le aveesea o lapisi ma otaota o loo nonofo ma tau tuufua ai iniseti o le namu e feavea’iina le vairusi o le fiva o ponaivi.
