O le asō, Aso Gafua, 25 o Aokuso 2025 lea ua faatulaga e amata faagasolo ai le faamasinoga o se alii ua molia i lona faapogaia o le maliliu o tagata e to’alima ia na uma o latou soifua ina ua mu se fale, le Loafers Lodge i Ueligitone.
O lea faalavelave na tupu i le aso 16 o Me i le 2023, ina ua sasao ane se afi i lea nofoaga pe tusa o le vaeluaga o le po i lea aso, ma maliliu ai ni tamā matutua e to’afā e silia ma le 60 ma ona tupu tausaga o soifua, ma le to’atasi e 50 tausaga o lona soifua.
O le alii lea e tula’i i le asō mo ona moliaga i lenei faalavelave, e lē o mafai ona faataga le faailoa o lona suafa, ma o loo tetee foi i ona moliaga e lima o le fasioti tagata faamoemoeina ma moliaga e lua o le susunuina ma le loto iai o lea fale.
Na faaataata mai e lana loia se manatu e faapea o le a faailoa i totonu o le faamasinoga le tulaga o le lē atoatoa o le malosi faalemafaufau o le alii ua molia nei, ma o lenei matāupu e fofogaina i le Faamasinoga Maualuga i Ueligione, ma le faamoemoe e ono oo atu i le lima vaiaso e faagasolo ai lenei faamasinoga.
O le masina o Iuni o le tausaga nei lava na molia ai e leoleo nisi tagata se to’afā i moliaga o le fasioti tagata pa’ivalea (manslaughter) mai lea lava matāupu, ina ua mae’a su’esu’ega a leoleo i lenei fale na mu, ma iloa ai e le’i mulimulita’ia e i latou nei e to’afā sa puleaina le faagaioiga o lenei fale, tulafono mo le saogalemu mai se afi.
E ta’i sefulu moliaga o le tagata e to’atasi o i latou nei e to’afā, na molia ai i le fasioti tagata pa’ivalea; e iai foi ma isi o latou moliaga i le lē tausisia o o latou tiute e tusa ai ma le Tulafono o le Soifua Mālōlōina ma le Saogalemu i Galuega.
Na teena e i latou uma e to’afā nei moliaga, ma ua faatulaga ai nei le tutula’i i le faamasinoga i le taufaai’ui’uga o le tausaga fou 2026.
Puna o Faamatalaga: https://www.stuff.co.nz/nz-news/360800103/loafers-lodge-fire-murder-trial-begin-wellington-high-court
