E 4 miliona 200 afe tālā le tau atoa o le nofoaga fou i Tafaigata faatasi ai ma le masini e susunu ma faatama’ia ai otaota uma o galuega faasoifua mālōlōina, faapea otaota e ma’ale’ale ma faaeteete gatā o latou aafiaga i le soifua mālōlōina o tagata.
O lea galuega ua mae’a na umusa i le Aso Lua ma tatala aloa’ia e le Palemia o le malo tausi.
I le saunoaga a le Palemia tausi le afioga Fiame Naomi Mataafa na ia faafetaia ai le faletupe o le lalolagi o le faalapotopotoga o le UNICEF ma isi auaunaga faavaomalo sa togi ma’a i le faatupeina o le galuega.
E fā taavale o le ituaiga o le van e sefululima nofoa sa foa’i ai foi i le tatalaina o lea galuega, ma o taavale e fesoasoani i le polokalame o le tuipuipui mo fanau o loo faatino e le Matāgaluega o le Soifua Mālōlōina.
