O le vaiaso nei na molimauina ai e uo ma aiga le amanaiaina o le sao o nisi o tamālii o le Atu Kuki na ofo o latou soifua e auauna ma tautua ai mo Peretania a o iai i le vaitau o le malosi o le fetaua’iga o malo tetele i le Taua Lona Lua o le Lalolagi.
Ta’ua o “coastwatchers”, poo ni tagata e vaavaai ma lipotia ni vaalele ma nisi o ‘autau e agai atu i le Pasefika.
O se galuega faigata ma e ono lamatia ai le ola, peitai sa faatino e le toatele o alii ma taulelea o le motu o le Atu Kuki a o iai i lalo o le vaavaaiga a Niu Sila.
Mai i lipoti a le leitio faavaomalo a Niu Sila, o nei alii sa fai ma mata ma taliga o atunuu tetele e fā na auaufaatasi, o Peretania Tele (UK), o Lusia e pei ona avea ma Soviet Union ma le Iunaite Setete poo Amerika (United States) ma le malo o Saina.
I le tuanai ai o le tele o tausaga, o lea faato’ā aloaia ona amanaia o tamā, taulelea faapea nisi o talavou sa tofia e tauaveina lea galuega.
Ma i le faatino ai o lea galuega fīta, ua faamauina na o alii mai Niu Sila na amanaia peitai ua suia lea vaega o le talafaasolopito ina ua aloaia ona amanaia e le tamaitai Kovana Sili o Niu Sila, Dame Cindy Kiro ia alii ma tuuina atu ai i aiga o le to’a 25 na faatinoina lea tautua.
I se sauniga faapitoa i Ueligitone na saunoa ai le tamaitai Kovana ma ia faafetaia ai nei alii i lo latou sao i le malupuipuia o le Vasa Pasefika.
Ae o se fiafiaga tele foi lea mo le alii ia William Kiri Cuthers, o lē na tu’itu’i pea i faitotoa a le NZ Defence Force ma le Palemia mo lea vaega tāua, ia ‘aua ne’i galo atu le tautua matavela a o latou tuaa na faatino mo le Pasefika aemaise mo Niu Sila.
Na molimauina le maligi o loimata o aiga ina ua valaau taitoatasi igoa o a latou tuaa.
O le agaga faagaeetia ma le faafetai ona o le amanaia o nai o latou tuaa na tautiga mo se saolotoga o le toatele.
